ليكن شعارك "تلاقى امه رقاصة"

ريح ضميرك يا معلم وروح صيف وتابع الدورى وشوف اخبار نسوان الساحل ايه والخروجة النهاردة فين وماتشغلكش دماغك واليك هذه النصايح لصيف سعيد وحياة مريحة بدون مسئولية فى المطلق.

1. لو اخلوا سبيل الضباط قول بمتهى البساطة ان دول مش شهداء اصلا وان ال 90 قسم اللى اتحرقوا على مستوى الجمهورية مش بسبب تعنت الشرطة دول تنظيم سرى ماسونى قطرى ثورى اخضر تحت قيادة المارشال بابا غنوج..شد انت على الساحل مالاكش دعوة
2. لو لقيت واحد عامل حادثة على طريق الساحل اوعى تقف تساعده بمنتهى البساطة قول تلاقى امه رقاصة وهى اللى جايباله العربية وهو اكيد مش تعبان فى فلوسها وهو اكيد سكران ويستاهل اللى يجراله... كبر منه وروح زبط انت بيرتك قبل البحر وماتنساش ترجع العربية اللى انت واخدها من ورا ابوك.
3. لو واحدة بتتعاكس سواء تعرفها او ماتعرفهاش اوعى تروح تلحقها لو مش محجبة قول ما هى لو كانت محجبة كنت هاساعدها لو محجبة قول ما هى لابسة ضيق لو مش لابسة ضيق قول تلاقيها مش محجبة عن اقتناع لو منقبة قول النقاب عادات مش عبادات وسيبها تتعاكس..المهم هى اللى غلطانة..شد يا معلم قبل الحجر ما يخلصوا هوا البحر
4. لو حد قالك ننزل نعترض على اللى بيحصل للبلد..قول انا استشهدت مرتين فى الثورة قبل كدة بس دة وقت عمل وانا رايح اشوف الماتش علشان ارفه عن نفسى شوية علشان اقدر اكمل عمل وبناء وجهد.
5. لو اتجرأ واحد وقالك نتضامن مع المعتصمين فى التحرير ببساطة قوله شباب 25 يناير مشى يوم 25 يناير زى ما الاغنية ما بتقول وان الموجودين دول عواطلية وبلطجية وباعة جائلين وناس موقفة حال البلد حتى لو كانوا هم الى بيتضربوا من الشرطة وهم اللى بينظموا المرور علشان الميدان يمشى.
6. لو حد اتهمك انك من الفلول خليه يرن عليك وهو يسمع رنج تون الثورة بنفسه وقوله كل واحد بيعمل اللى يقدر عليه ..وانك وطنى بدليل انك بتعلب بفرق مصر فى البلاى ستاشين وقدام البرازيل كمان.
7. لو ماكنتش مذاكر غش وقول انك جزء من النظام ولو مذاكر كويس افضح الغشاشين وقول مصر قبل 25 يناير غير مصر بعد 25 يناير
8. لو المزة كانت ميولها ثورية احكى عن مغامراتك فى موقعة الجمل وانك وقفت قدام الرصاص والبلطجية ولو من بنات مبارك قولها انك لسة باعت له بوكيه ورد على شرم وانك شايف ان الثوار دول جبناء وانك اشجع لانك بتبنى البلد وانت بتبعت ايميلات عنيفة وبتابع الفيس بوك يوميا من الشغل.
9. علشان تريحى ضميرك يا آنسة ما بين اختيارك للشاب الثورى وللشاب الفلول وانتى اصلاً ماعاندكيش ميول فى الحياة لان بابا وماما هم اللى اختارولك كل حاجة..ببساطة اختارى اللى عربيته احلى وساعتها شوفى انت مع ولا ضد الثورة. نفس الموضوع بالنسبة للشباب بس اختار البنت الاجمل.

واخيرا لو عمرك ما هتعمل الحاجات دى ولو انتى عمرك ما هتفكرى بالشكل دة فمرحبا بكم فى ميدان التحرير ميدان الاحرار..موعدنا تمانية يوليو

ملحوظة "هذه المقالة لا تنطبق على من تحول ظروفهم دون استطاعتهم القدوم  او للغير مؤمنين بالتظاهرات عن اقتناع وليس عن استسهال"