دى ثورة ياولاد الكلب - حزب الكنبة

حزب الكنبة

تعريف اهداف الحزب :

مصمصة الشفايف و التهجم والتريقة على ثوار مصر والا مبالاة لاى شئ يخص الحرية والكرامة  والعدالة الاجتماعة  ( ماعندهمش نخوة ) .

طرق انتشار الحزب :

بعض القنوات والجرائد التى مازالت تسبح بحمد النظام السابق فى الاصل ومن تحت لتحت هما كارهين الثورة واللى جابوا الثورة 
ومن على الوش هاتك ياثورة وهاتك ياكلام ماتقولش جيفارا رجع من تانى وهما فى الاصل اوساخ  بتوع 200 الف جنية فى الشهر غير الاعلانات غير اللى من تحت لتحت  ومستفدين اصلا من فساد النظام السابق.

لغة تخاطب حزب الكنبة:

اديك بقى امثلة مالهاش عدد :

فى وسط ما الناس بتموت فى الثورة والدم مالى الميدان وسايل  وكلنا بنموت من القهر على مصر وعلى الثوار وكلنا عندنا احساس بالمهانة  واغلبنا فى الميدان بيموت على اصحابة اللى ماتوا على اخواتة اللى الشرطة والبلد سيلت دمائهم وملت بيهم الميدان .

-  تطلع لك واحدة بنت ناس  ( ؟؟؟) زميلة لنا وتقول لك خلاصصصص زهقنا من القرف دا  الواد ابنى عايز يروح النادى عايز يخرج محبوس .؟؟؟

- مثال اخر : تقول لهم لو عندكم شهيد منكم لو ابنكم بنتكم شهداء ح تحسوا اد اية احنا محروقين على الثورة وعلى دم الشهداء يقوم يطلع لك واحدة فى الظاهر مثقفة وللاسف نص كالامها فرنساوى مش انجليزى يعنى مميزة ( فرنساوى يامعلم )  تقول لك اية بقى :

- اثبت لى ان هما شهداء دول بلطجية كلهم بلطجية راحوا لية القسم راحوا لية يحتكوا بالشرطة فى الاقسام وكمان فى ميدان التحرير .

تقول لها يابنتى بلاش استخفاف حتى بدم الشهداء انتوا معندكوش دم .

تطلع واحدة تانية تنط فى وشك تقول لك :

مين قال لك انهم شهداء اذا كان ام الشهيدة جت فى التلفزيون بنفسها  ( ام سالى  ) جت وقالت هى انتحرت ورمت نفسها من الشباك وانا شوفت الحلقة بنفسى وانتى عاملهالى شهيدة وحاطط صورتها فى المدونة عندك وبتضلل الناس وتقول شهيدة .......؟؟ كدا  انا اللى بضلل الناس بمدونتى كدا طلعت انا نفسى من الفلول .

ويجى واحد بقى ابن ناس تانى اوى راكب طبعا عربية تمنها 280 الف جنية وهو عندة 26 سنة طبعا مجبهاش بعرقة واشتغل معنا فى الشركة  بسبب ان ابوة وامة فى الرقابة الادارية وابن خالة فى الامن وبنت عمتة فى رئاسة الوزراء و غالبا بيجب بمرتبة كله يدوبك الدليفرى بتاع الفطار فى الشغل .

يجى الشاب دا بقى ويقول لك كفاية بقى القرف دا  اية دااااااا؟ بص لمناظرهم وشوف لابسين اية وبتكلموا ازاى دول ناس رابش دول ناس  واطية ناس  بيئة ... ( اقول اة يا ابن الكلب  )  الناس مش بتتقاس بلبسها ولا بمنظرها ولا عربيتها  الناس بتتقاس بموقفها و بطولتها وتصديها لكم الفاسد اللى ملى حتى انفونة  اة يا  ابن  الكلب ما انت مش حاسس بحاجة منزووووع الاحساس و الضمير .

وسط كل دا  الناس بتموت اهالى الشهداء بتموت هى كمان مرة تانية من حسرتهم على اولادهم ومن تجاهل الحكومة لهم  . 

والمصابيين بنشحت عشان نعالجهم بنلم من بعض وبندور على الحالات اللى تستحق وبنديها على قد ما نقدر عشان الحكومة سيباهم وفى منهم ناس اتعمت ناس مش عارفة تاكل ولا عارفة تشرب .

فى وسط كل دا يطلع لك واحد ابن ( تيت ...)

يقول لك انتم خربتم البلد شوفوا البورصة واللى بيحصل لها وبتخسر كام كل يوم شوفوا السياحة ازاى اتضربت شوفوا ازاى مش عارفين نسهر على كافية ولا عارفين نسافر مارينا من الخوف .

اقول لة يا ابن التيت الناس بتموت وانت بتفكر فى مارينا وفى الكافية

يرد يقول لك ما يموت ما يغور فى داهية لية يعنى ينزل التحرير يروح لية ويعرض نفسة ويعرضنا لكل القرف داااااااااا.

ويجى واحد محترم جميل زميل لنا سلفى اخوانجى متدين يقول لك خلاص بقى كفاية الناس تروح وتسيب الدنيا تهدى

ويروح راقع لك الفتوة الجامدة جهارا نهارا  ( ميدان التحرير  فتنة )

اى والله بيوصف ان الميدان بقى فتنة

هما دول حزب الكنبة –

ارحموناااااااااااااااااااااا – اسكتواااااااااااااااااااااااا- بلاش حد يفتح فمة بكلمة واحدة سيبوا البلد تتصلح

لم تشاركوا  - خونتم – استهزأتم – كمان بتتكلموا

دى ثورة ياولاد الكلب

ملحوظة هامة :

عارف انى بتكلم لغة عامية فصحى بس دا لسبب ان حزب الكنبة مش ح يفهم غير كدا لية لان تعبيرات مثل : ثورة – كرامة – حرية – عدالة .. مش فى قاموسهم

هشام حسنى